Kalendaryo

Nu Enero sa kinaban, sa siglong ginikanan,

Sumirang su liwanag sa kadlagan kan gamgam;

Nu mabaak su bunay, su siwo nagdalagan,

Buminuklad su dahon sa pisog nin paglalang.

Nu Pebrero sa Eden, an sinabi sa istorya,

Guminayon su ulod, kulibawbaw pag-ariba;

Nagimata su tao nu nagin hawak su dugi,

Nagbados su dagami, nagin bulawan su pasi.

Nu Marso sa alamat, nagpoon su pagsurat,

Pinanday su promesa sa kadunungang muklat;

Alintuto nin letra sukol su alapaap,

Binuso nu kansion su ararom na dagat.

Nu Abril sa disyerto, naragubrob su maringis,

Luminaad su gera, luminumoy pati lagit;

Sa madugong batalya, su badil naghadeng boses,

Ultimong katanosan daing sugad na linigis.

Nu Mayo sa banwaan, buminukad su burak,

Sa musika nin ogma, su pagmondo nawarak;

Su tawo nagpiesta, nabuyong sa ngarakngak,

Alagad daing sugad, nasakim pa sa pirak.

Nu Hunyo sa sirangan, nagimata su kadaklan,

Busabos na rogaring binarawi sa marimang;

Nilugtos su kadena, linupog su tampalasan,

Kakulor nu bandera su bandilyong kaogmahan.

Nu Hulyo sa solnupan, paglaom an nagin timon,

‘Nganing dai malamos sa lawod na madiklom;

Sa purisaw na banggi, nagin giya su bitoon,

Pagsusog sa panuga nagin danay na susundon.

Nu Agosto sa oma, binayubo nin paghigos

Su palad na opisyo maski makuri su daplos;

Naghingwa nin triumpo, isinikwal su sogot,

Sa kastigo nin bagyo, su kusog iyong tukod.

Nu Septiembre sa rona, maski huri su mirasol,

An atang ka’ning burak bulawan man su kakolor;

Siring sa satung buhay, aram na di pa sierto

Oras nin pagkamundag o oras ni El Muerto.

Nu Oktubre sa simban, nakulibat sa sermon

Su tunay na susundon pag-abot nin Orasion;

Dangugon an osipon, riparuhon an panahon,

Hemateon an tugon, kap’tan man an bendision.

Nu Nobiembre sa panteon, maitomon su nagtogdon

Kan pigsurok nu ulod su kuwebang daing paros;

Naupos su kandila, pati langit nagrumirom,

Su hawak kadtong turog nagin alpog pagkatapos.

Dai ta nanggad kapot, awot pang bakong bagay

An paghusgar nin tugang sa tamtaman nin buhay;

Purog an satong dunong, an talastas ta landay,

Pantas man an Disyembre sa wakas nin salaysay.

—m.m.lorena tariman

 (enero 1999)